Ons spring sommer vanjaar vroeg weg! Ons het reeds vanjaar ’n eerste skrywe aan ons digters gestuur. Weereens welkom by die GHA.

Miskien het jy al vir jouself afgevra waarom skryf jy, en dit nogal gedigte! Meer nog: waarom neem jy aan die GHA Digkompetisie deel?

Jy het nog altyd ’n dryfveer gevoel om te skryf, maar weet nie altyd waar en hoe nie. Jy is nou op die regte plek. By die GHA “skryf” ons, nie sommer so nie, ons skryf keurige en interessante gedigte. Ons gereelde deelnemers kan daarvan getuig, dat dit een groot stuk vreugde is om ’n gedig te sien wat uit ’n mens se kop bollemakiesie geslaan het.

Waarom is ’n gedig so andersoortig? ’n Gedig is ’n besondere uiting in woorde, van beelde en gevoelens. Jy kan jou innerlike wese uitstort, sonder om dit altyd te erken. Die skryf van ’n gedig kom nie vanself nie. Jou brein is ’n konglomeraat van uitdrukkings, gebeure, drome, idees, emosies – dis behoorlik ’n kraaines waarin jy nie die kop of die stert van die kraai kan vind nie.

Ons het alreeds heerlike korrespondensie van ons digters ontvang. Met verloop van tyd gaan ons al die onsekerhede wat ons digters moontlik het, aanspreek.

’n Baie belangrike aspek is die lengte van die gedig.  Die lengte moet nie 30 reëls oorskry nie. Die versreëls moet nie meer as 50 karakters, dit is letters, spasies en leestekens ingesluit, wees nie, d.w.s. ’n versreël mag nie oorloop na ’n volgende versreël nie.

Die vraag het ook opgeduik i.v.m. die 𝘃𝗼𝗲𝘁𝗻𝗼𝘁𝗮𝘀. Tel dit as deel van die 30 versreëls van die gedig?

Die voetnotas tel nie as deel van die 30 reëls van die inhoud van die gedig nie. Indien ’n verwysing in ’n voetnota noodsaaklik is, let daarop dat dit onderaan die gedig geplaas word en so kort as moontlik gehou word. Gebruik dit soos volg:

1.    Met erkenning aan Pieter Koekemoer (dit is die digter), (plaas ’n komma hier) “Swaeltjies in die somer” (gedig of prosawerk se titel), (plaas ’n komma hier) uit 𝙑𝙤ë𝙡𝙨 𝙨𝙚 𝙢𝙞𝙣𝙣𝙚𝙨𝙖𝙣𝙜𝙚 (dit is die bundel of  breë verwysing se titel, (plaas ’n komma hier) en die datum van die publikasie bv. 1956 (punt).

2.    Indien daar ’n verduideliking van die agtergrond of omstandighede van die inhoud nodig is, maak ’n sterretjie (asterisk) aan die begin van die woord in die teks self, bv.
“Die ou,*Tarkos, was vir jou ’n voorloper …” Gebruik die asterisk ook so as dit die titel van die gedig is. Herhaal die asterisk by die voetnoot en gee slegs die mees noodsaaklike besonderhede, dis dus ’n verwysingsteken na ’n voetnoot, nl. *Tarkos, die bynaam van die bywoner op die plaas 𝙎𝙤𝙣𝙙𝙚𝙧𝙬𝙖𝙩𝙚𝙧𝙨, Oos-Kaap.

3.    Indien die gedig opgedra word aan iemand spesiaal, kom die “byskrif” bo-aan die gedig as subtitel en moet in kursiewe letters wees, bv. 𝙊𝙥𝙜𝙚𝙙𝙧𝙖 𝙖𝙖𝙣 𝙢𝙮 𝙥𝙖, 𝙆𝙤𝙤𝙨 𝙆𝙖𝙥𝙩𝙚𝙞𝙣, 𝙤𝙤𝙧𝙡𝙚𝙙𝙚 2024. Gee asb. die naam, titel, verwantskap of omstandighede, bv. ’𝙣 𝙃𝙚𝙧𝙞𝙣𝙣𝙚𝙧𝙞𝙣𝙜 𝙖𝙖𝙣 𝙙𝙞𝙚 𝘽𝙤𝙨𝙤𝙤𝙧𝙡𝙤𝙜. Hou dit asb. baie kort.

4.    Onthou dat die naam van die gedig in aanhalingstekens is en die digbundel of geskrif  kursief gedruk moet word bv. “Wilgerboom by die spruit,” 𝘿𝙞𝙚 𝙗𝙤𝙢𝙚 𝙥𝙧𝙖𝙖𝙩, 2023.

Vriende, vind daardie kraai in die mengelmoes van takke en blare en begin skryf! Ons sien uit na die interessante gedigte wat in aantog is.

Vriendelike groete

𝗟𝗼𝘂𝗶𝘀𝗲 𝗟𝗮𝗰𝗵𝗲𝗻𝗶𝗰𝗵𝘁
𝗞𝗼ö𝗿𝗱𝗶𝗻𝗲𝗲𝗿𝗱𝗲𝗿 𝗗𝗶𝗴𝗸𝗼𝗺𝗽𝗲𝘁𝗶𝘀𝗶𝗲