Estelle Pretorius is in 1953 gebore en het in 1971 aan die Hoër
Meisieskool Helpmekaar gematrikuleer. In dieselfde jaar het sy haar debuut as skrywer en digter in die bundel Drumpel gemaak, as een van die pryswenners. Sy het nagraads in Afrikaans en Kultuurgeskiedenis
aan die Universiteit van Pretoria studeer, waar sy daarna 15 jaar lank ‘n dosent was. Die afgelope 20 jaar is sy as navorser by die Erfenisstigting en Voortrekkermonument in Pretoria werksaam. Estelle is die skrywer
van 3 boeke, meer as 25 artikels en medewerker van verskeie
vakpublikasies.

Johannes Adolf Heyns gebore 20/08/1973 te Klerksdorp in die ou WesTransvaal. Matrukileer in 1991 en sluit by die Weermag aan. Daarna het Johan ‘n mynbouloopbaan begin volg. In 2014 het hy weens mediese redes sy werk op die myn verloor.
Johan het reeds 3 eie bundels gepubliseer, 8 gesamentlike digbundels, en 3 gesamentlike kinderstories. In 2019 verskyn sy lewensverhaal in die Vroue Keur met die boodskap: Daar is hoop – vir mense wat gemolesteer is. In 2017 het hy ‘n kontrak geteken met Lamondt Internasionaal as liriekskrywer. Verder het hy in 2019 Filmregte op ‘n manuskrip verkoop.
Hy is tans ongetroud.

Elizabeth Greef groei in die platteland van Potgietersrus op waar sy in 1965 matrikuleer. In 1971 tree sy in die huwelik met Gawie en word hulle met drie
kinders en 7 kleinkinders geseën. As kind lees Elizabeth alles waarop sy haar oë kan lê en gedy ‘n liefde vir die Afrikaanse taal in haar hart. Afgetree uit die arbeidsmark, verwerf sy in 2011 ‘n graad in Teologie by Unisa.
Hoewel Elizabeth twee kinderstories, ‘n digbundel vir volwassenes, ‘n Verseboek vir Laerskoolkinders, en ‘n Bybelse Musiekspel gepubliseer het, is
Bybelstudie en veral die apokalips haar groot passie. In 2015 publiseer sy haar eerste Geestelike boek; “En hulle in Ons” en in 2017: ”Dit is Verby.” Vir elke
gawe en hoogtepunt in haar lewe gee sy al die eer aan haar Skepper wat haar elke tree op haar lewenspad lei.

Gebore 12 Mei 1954 in Oos-Londen as Johannes Jacobus Daniël Strydom. Johan het gematrikuleer aan Durban Port Natal Hoërskool. Na matriek vir 6 jaar by verskillende staatsdepartemente gewerk voordat ek ‘n loopbaan in die metalurgiese afdeling op Anglo American steenkoolmyne gevolg het vir 27 jaar, waarvan ons 2 jaar op Utrecht Natal gewoon het en 25 jaar in Witbank. Getroud in 1975 met Janet, en het ‘n seun en ‘n dogter. Johan en Janet woon op Kuruman waar hulle ‘n gastehuisie bedryf. Johan hou homself besig met die tuin, vetplante, paar bonsai boompies, drie kleinkinders, vyf honde, twee papegaaie, vier eende, sewe makoue en bietjie dig oor ons omgewing, mense uit dankbaarheid vir die genade en liefde van ons Skepper.

Joop (Josef Johannes) Swanepoel is in 1952 op Wolmaransstad in die
destydse Wes-Transvaal gebore en het op ‘n plaas naby Makwassie groot geword. Hy het op Wolmaransstad gematrikuleer en by Tukkies in Pretoria gestudeer, ná 9 maande diensplig in die infanteriekorps. Hy het
toe ‘n aantal jare by die Departement Statistiek gewerk waarna hy die res van sy werksjare by die NOK deurgebring het. Hy is getroud met Tillie Coetzee vanaf Lydenburg en hulle het twee dogters, een seun en sover vier kleinseuns. Hy het in 2012 afgetree en ‘n aantal jare later na Orania verhuis. Hy hou homself graag besig met lees, tuinmaak, staalwerkies,
proeflees, jukskei en kultuursake.

Hennie Egen is op 26 November 1940 op Tzaneen gebore. Hy het sy skoolopleiding op Naboomspruit ondergaan waar sy liefde vir skryf reeds duidelik was. Na skool wou hy hom as onderwyser bekwaam maar na sy eerste proeftydperk het hy besef dat hy eerder ‘n ander beroep moet volg as hy nie groot moeilikheid wil hê nie. Hy het ‘n draai in die goudmyne gemaak, was ‘n polisieman, sirkulasiebestuurder vir koerante, advertensies verkoop en as verslaggewer by verskeie koerante gewerk, Nuusredakteur, redakteur en skakelbeampte. Van sy gedigte het al in vier digbundels verskyn en hy skryf elke week ‘n gedig vir die plaaslike koerant op Bronkhorstspruit waar hy sedert 1987 woon.
Sy vrou het hom in 2010 ontval.